ივანე ჯავახიშვილი (1876-1940) - ისტორიკოსი და საზოგადო მოღვაწე, თბილისის სახელმწიფო უნივერსიტეტის (თსუ) თანადამფუძნებელი, საქართველოსა და კავკასიის ისტორიის თანამედროვე სამეცნიერო სკოლის ერთ-ერთი ფუძემდებელი, საბჭოთა კავშირის მეცნიერებათა აკადემიის აკადემიკოსი, ისტორიის მეცნიერებათა დოქტორი, პროფესორი.

ალექსანდრე ჯავახიშვილი - ივანეს მამა, ძლიერი ინტელექტის, მტკიცე ნებისყოფის, ტანდაბალი, მაგრამ მკვრივი აგებულების იყო. ახასიათებდა პირდაპირობა, ხასიათის სისპეტაკე, თავაზიანობა, ბეჯითობა და თავმდაბლობა. თავადი ალექსანდრე ივანეს ძე ჯავახიშვილი გიმნაზიის მასწავლებელი იყო. ალექსანდრე წლების მანძილზე მუშაობდა აღმოსავლეთ საქართველოს სკოლების ზედამხედველად. ერთ-ერთ სკოლაში გაიცნო თავისი მომავალი მეუღლე სოფიო ვახვახიშვილი, თელაველი თავადის – ათანასე ვახვახიშვილის ასული. მათ ჰყავდათ ექვსი შვილი: ეკატერინე, ივანე, გიორგი, დათა, ალექსანდრა, მიხეილი. მამა ცდილობდა, შვილები დაეინტერესებინა სწავლით და ყოველნაირად უწყობდა ხელს.